На здымку з правага боку – тратуар і газоны пад вадою. Машыны па цэнтру здымка прыпаркаваныя на праезджай частцы вуліцы. Такое становішча -- праз гадзіну, як перастаў лівень.
Помню, у дзяцінстве навальніцы-ліўні здараліся часта. І былі цёплымі. З маланкамі – на ўсё неба ад края да края. І з такімі грымотамі, што, здавалася, хата разваліцца. Як толькі хмара адыходзіла за вёску і лівень станавіўся дажджом, мы выбягалі з хат і, закасаўшы штаны, бегалі па цёплых лужах. А лівень-патоп у нашай вёсцы быў толькі раз.
За 46 гадоў, што жыву ў Жодзіне, сёнешні лівень-патоп трэці. Разумеецца, на маю памяць. І на мой погляд. А калі яшчэ крыху ўдакладніць, то сёння, 4 мая, як раз у гэты час я быў не ў горадзе, а за горадам, на “дурной савецкай дачы”. У горад прыехаў праз 45-50 хвілін, як лівень перайшоў у невялічкі дожджык, пры якім можна ехаць на веласіпедзе. Можна – у сэнсе бяспекі на дарозе ды з “папраўкаю”, што ўсёроўна прамокнеш да ніткі.
Каля аўтобуснага прыпынку “Школа № 7” убачыў вось такі “сюжэт”.
No comments…
Вадзіцель “audi” чакае, пакуль крыху сцячэ вада, а вадзіцелю “ford” няма часу чакаць і любавацца карцінкамі -- развярнуўся “на 180 градусаў”: навошта лезці ў лужу, калі можна праехаць па іншаму шляху? Ды яго машына – грузавая: ён вязе ў магазін хлеб, торты, цукеркі…
Вадзіцель джыпа “suzuki” – з гонарам: хіба гэта лужа для такой машыны??!
“Вы паедзеце следам за джыпам?” – спытаў у вадзіцеля пярэдняй машыны.
“Нет: рискованно…”
Аглянуўся: “капейка” ужо на самым глыбокім месцы!!! Насустрач ёй – “газель”. Цікава паглядзець, што будзе далей…
Як толькі “капейка” выкацілася на бяспечны ўзровень вады, вадзіцель “renault” паехаў следам…
Аўтобус падняў такую высокую хвалю, што яна дакацілася да тратуара, таму ніхто не асмеліўся ехаць ні за аўтобусам, ні насустрач яму.
А як хвалі супакоіліся, хлопчык з таго берага пачаў “перапраўляцца” праз вуліцу-лужу на веласіпедзе. Яго веласіпед – дарожны, дыяметр шыны – 622 мм: можна меркаваць пра ўзровень вады. А якім ён быў гадзіну таму, калі лівень толькі што перастаў?..
Калі яшчэ крыху закасаць штаны, то можна перайсці вуліцу-лужу ўброд…
Хтосці раніцай прыпаркаваў машыну. Ці адпаркуе ён яе вечарам?
Праз пяць хвілін падыйшоў да школы № 5: тут дваровыя праезды на адным узроўні з праезджай часткай вуліцы, таму вада разлілася па дварах прылягаючых дамоў.
Пра максімальны ўзровень вады насупраць уваходу ў школу можна меркаваць па кучках
смецця на сцежцы: вада ўжо адступіла на два метры. Прыкідваю: тратуар быў заліты вадою да першай ступені ўсходцаў, што па вертыкалі складзе каля 10-15 сантыметраў.
Вось якое назіранне. І крыху роздуму.
P.S.
Таксісты -- яны заўсёды спяшаюцца да нас! -- аб'язджалі лужу па тратуару. За імі і іншыя. Але фотаздымкі пра гэта не паказваю з-за магчымых непрыемнасцяў для вадзіцеляў.
Комментарии
Всегда нужно иметь в запасе
Всегда нужно иметь в запасе лодку!
Отправить комментарий