Андрэй Караленка
МАЛАДЗЕЧНА, 13-14 снежня: МАРАФОН і звышМАРАФОН
Маладзечненскі “зімні” марафон-са-звышмарафонам (100 км) – у манежы.
Безумоўна, бегчы ЗІМОЮ ў манежы – прыемна! Прыемна, хаця ў гэтыя дні, 13-га і 14 снежня, на вуліцы было ціха і цёпла настолькі, што нават я мог бегчы 5-10 км.
У папярэднія гады, калі ў Беларусі праводзілася болей 30-ці прабегаў у год, здаралася бегчы і пры мінус-20, і пад дажджом з мокрым снегам, па лужах. Беглі!
Мінула пяць-дзесяць гадоў… Таму мне бегчы зімою ў манежы – НАДТА прыемна!
Прыемна, хаця лінолеум на дарожках – той жа: я, стары ды не надта шустры, магу спаткнуцца… Не спаткнуўся!
Бегчы зімою ў манежы НАМ прыемна. А вось СУДДЗЯМ лічыць нашы “кругі” – ой, цяжка. Паспрабаваў я ўявіць сябе на іх месцы -- такая праца непасільная для мяне. Таму я заўсёды з асабліваю павагаю і далікатнасцю стаўлюся да суддзяў…
13 снежня, субота – першы дзень спаборніцтваў: дзеці і дарослыя -- дыстанцыя 5 км. Хаця ў “Палажэнні” аб спаборніцтвах можна было бачыць нейкія “абмежаванні” па ўзросту як для дзяцей, так і для дарослых, усё ж прыехалі ўсе, хто хацеў прабегчы. Хто хацеў! Яно зразумела: калі б беглі не ў манежы, то я, магчыма, не адважыўся б бегчы два дні запар. А так…
Магчыма, гэтае “абмежаванне” сказалася на колькасці ўдзельнікаў у першы дзень: мала!.. Мне асабіста было шкада, што не ўбачыў тых дзяцей, якіх фатаграфаваў у 2012-м і ў 2013 гадах: яны беглі надта шпарка і прыгожа -- хацеў палюбавацца. Меркаванне асабістае і выключна знешнее, з погляду фотарэпарцёра, але ўсё ж…
Паглядзім, хто прыехаў і як мы беглі.
Нажаль, здымкаў мала і яны нізкай якасці: у фотакамяры аказалася змененаю экспазіцыя!(!!!) Як магло такое здарыцца, уявіць не магу, бо ў апошнія тры гады нічога не меняў. Экспазіцыя зменена, а фотаўспышку я не люблю – амаль усе здымкі размытыя. Шкада!..
Гэта -- дзеці…
Яны дурэюць-забаўляюцца -- як дзеці: да старта болей гадзіны. Іх настаўніца стаіць побач -- каля "шведскай сценкі" і назірае...
Гэта таксама -- дзеці, але старэйшыя на 3-6 гадоў...
Яны пажадалі “сфоціцца” з дзедам-фатографам: лічаць мяне старэйшым на марафоне… А старэйшы не я -- старэшы Леанід Каладко: сёння ён будзе бегчы 5 км, а заўтра – марафон.
Мой самы лепшы здымак на гэтым марафоне… (ТАКІ ўрок!..)
Працяг фотарэпартажа (марафон, 14 снежня) будзе заўтра на старонцы “Марафон”.
Прашу прабачэння за дрэнную якасць фатаграфій.
Комментарии
Отправить комментарий